मुंबईची हेलिकॉप्टर सफारी

मुंबईची हेलिकॉप्टर सफारी

ऑस्ट्रेलियाला फिरायला गेलेल्या अनेकांकडून तेथील हेलिकॉप्टर सफारीचा अनुभव ऐकायला मिळतो. सिडनीच्या डोक्यावरून उडत सिडनीचा प्रसिद्ध ऑपेरा पाहण्याची मौज औरच! पण आता मुंबई दर्शनासाठी आलेल्या पर्यटकांनाही लवकरच हेलिकॉप्टरमधून मुंबईचे विंहगम दृश्य नजरेत साठवून ठेवण्याची संधी मिळणार आहे. वांदे वरळी सी लिंक, चौपाटीचा क्वीन्स नेकलेस व महालक्ष्मी मंदिर या ठिकाणांचे दर्शन हेलिकॉप्टरमधून घेण्याची योजना लवकरच प्रत्यक्षात आकारणार आहे. सुमारे दीड हजार रुपयांमध्ये मुंबईकरांना ही 'जॉय राइड' मिळण्याची शक्यता आहे. 

ही योजना प्रत्यक्षात आणण्याच्या दृष्टीने ग्लोबल फ्लाइंग क्लबने बेस्ट प्रशासनासह करार केला आहे. या करारानुसार बेस्टच्या बॅकबे, धारावी व ओशिवरा बस डेपोमध्ये हेलिकॉप्टर टेक ऑफ व लँडिंगला परवानगी मिळाली आहे. ही योजना अंतिम टप्प्यात आली असून येत्या एक दीड महिन्यात प्रत्यक्षात डेपोत हेलिकॉप्टर टेक ऑफ-लँडिंगला सुरुवात होईल. या योजनेची शक्यता पडताळून पाहण्यासाठी धारावी डेपोमध्ये हेलिकॉप्टर टेक ऑफ आणि लँडिंगची यशस्वी चाचणीही घेतली. 

मुंबईत हेलिकॉप्टरने येणारे व्हीव्हीआयपी राजकारणी, उद्योजक, दुतावासाचे राजनैतिक अधिकारी यांना या योजनेचा फायदा होईल. तसेच मुंबईत येणाऱ्या पर्यटकांना व मुंबईकरांना हेलिकॉप्टरमधून मुंबई दर्शन घडवण्याची या कंपनीची योजना आहे, असे बेस्ट समितीचे अध्यक्ष संजय पोतनीस यांनी सांगितले. वांदे वरळी सी लिंक, महालक्ष्मी मंदिर तसेच चौपाटीचा क्वीन्स नेकलेसची हवाई सफर घडवण्याची कंपनीची तयारी आहे. त्यासाठी प्रत्येकी १२०० ते १५०० रुपये तिकीट आकारले जाईल. अतिमहत्त्वाच्या व्यक्ती मुंबईत आल्यावर स्त्यावरील वाहतूक बंद केली जाते. अशा अतिमहत्त्वाच्या व्यक्ती मुंबई विमानतळावरून मंत्रालयात किंवा राजभवनात मोटारीने जाताना खासगी मोटारी, बेस्टच्या बसेसची वाहतूक थांबवतात. या पंधरा मिनिटांच्या नाकाबंदीमध्ये चौदा हजार वाहने अडकून पडतात. मात्र ही व्हीव्हीआयपी मंडळी थेट हेलिकॉप्टरने रवाना झाल्यास मुंबईतल्या वाहतुकीचा वेग तीन टक्क्यांनी वाढेल, अशी ग्लोबल फ्लाईंग क्लबची आकडेवारी असल्याचे संजय पोतनीस यांनी सांगितले. 

मुंबईत २६जुलैसारखी आपत्कालीन परिस्थिती निर्माण झाल्यास ही कंपनी मोफत हेलिकॉप्टर सेवा पुरवेल. मुंबईत महालक्ष्मी रेसकोर्सचा हेलिपॅड खासगी हेलिकॉप्टरना दिला जातो. मुंबईत हेलिकॉप्टर सेवा पुरवणाऱ्या सव्वाशे कंपन्या आहेत. या सर्वांना बेस्ट डेपोतील हेलिपॅडचा फायदा होईल, असा दावा पोतनीस यांनी केला.