Effects on cashless mediclaim insurance
देशातील सहा महानगरांत दोन वर्षांपूर्वी सुरू झालेली मेडिक्लेममधील पीपीएन (प्रेफर्ड प्रोव्हायडर नेटवर्क) योजना आता लवकरच पुण्यातील हॉस्पिटल्समध्ये सुरू करण्यात येणार आहे. यामुळे येत्या काही दिवसांत विविध हॉस्पिटलमध्ये मिळणाऱ्या ' कॅशलेस ' इन्शुरन्सच्या पद्धतीत बरेच बदल होणार आहेत.
चार सरकारी विमा कंपन्यांनी जुलै २०११पासून ही एकत्रितपणे ही योजना सुरू केली आहे. त्यानुसार या कंपन्यांकडून मेडिक्लेम पॉलिसी घेणाऱ्यांना हॉस्पिटलमध्ये मिळणाऱ्या सोईसुविधांच्या दरांचे प्रमाणिकरण केले जाते. प्रत्येक हॉस्पिटलच्या प्रतिनिधींशी चर्चा करून या कंपन्या प्रत्येक उपचारांसाठी येणाऱ्या खर्चाचे पॅकेज निश्चित करतात. याच दरामध्ये हॉस्पिटलनी उपचार करणे अपेक्षित असते.
' सध्या मेडिक्लेमच्या व्यवसायापैकी सत्तर टक्के व्यवसाय या चार कंपन्यांकडे आहे. साहजिकच या कंपन्यांचा शब्द अंतिम असतो. या पूर्वी सहा महानगरांमध्ये अशाच पद्धतीने काम सुरू करण्यात आले आहे. ही पद्धत मान्य न करणाऱ्या हॉस्पिटलमध्ये कॅशलेस सुविधा बंद करण्यात येते. गेले दोन दिवस पुण्यातील विविध हॉस्पिटलबरोबर या कंपन्यांच्या वाटाघाटी सुरू आहेत ,' असे सूत्रांनी सांगितले.
या कंपन्यांनी दिलेले दर हे या पैकी अनेक हॉस्पिटल्सनी नाकारल्याचे सूत्रांनी नमूद केले. त्यांच्या माहितीनुसार , विमा कंपन्यांनी निश्चित केलेल्या दरातील पॅकेजमध्ये संबंधित शस्त्रक्रियेचा किंवा उपचाराचा खर्च भरून निघत नसल्याचे हॉस्पिटल्सचे म्हणणे आहे. विमा कंपन्यांनी निर्देशित केलेल्या किमतीत उपचार करायचे ठरविल्यास शस्त्रक्रिया करणाऱ्या डॉक्टरना सध्या देण्यात येतो त्यापेक्षा खूपच कमी मोबदला द्यावा लागेल असे या हॉस्पिटल्सचे म्हणणे आहे. कंपन्यांच्या म्हणण्यानुसार या पद्धतीमुळे पेशंटचा फायदा होतो. योग्य दरात त्यांच्यावर उपचार होतात आणि आहे त्याच पॉलिसीमध्ये अधिक उपचार करून घेणे शक्य होते.
या साऱ्यांमुळे सध्या पुण्यातील हॉस्पिटल्समधील वातावरण चांगलेच ढवळून निघाले आहे. पेशंटच्या दृष्टीने कॅशलेस सुविधा बंद झाल्यास या हॉस्पिटल्समध्ये उपचार करून घेणे अडचणीचे ठरणार आहे. त्यामुळे विमा कंपन्या आणि हॉस्पिटलमध्ये कोणता करार होतो आणि त्याच्या अटी काय असणार याबाबत औत्सुक्य आहे.
सहा महानगरांमध्ये ' पीपीएन ' पद्धतीने काम सुरू करण्यात आले आहे. ही पद्धत मान्य न करणाऱ्या हॉस्पिटलमध्ये कॅशलेस सुविधा बंद करण्यात येते. गेले दोन दिवस पुण्यातील विविध हॉस्पिटलबरोबर या कंपन्यांच्या वाटाघाटी सुरू आहेत.
No comments:
Post a Comment