Saving Accounts Taxless earnings बचत खात्याचे करमुक्त उत्पन्न

ऐकण्यात असे येते की बँकेच्या बचत खात्यावर मिळणाऱ्या व्याजाला दहा हजार रु.पर्यंत करमाफी आहे. हे खरे आहे का ? तसे असल्यास असे १० , ००० रु.पर्यंतचे व्याज इतर व्याज उत्पन्नात मिळवून नंतर त्याची वजावट आयकर कायद्याच्या कलम ' ८० सी ' खाली घ्यावी की हे व्याज इतर व्याज उत्पन्नाबरोबर न मोजता भविष्य निर्वाह निधीवरील व्याजासारखेच एकूण उत्पन्नात समाविष्ट न केलेल्या बाबींप्रमाणेच दाखवावे ? बचत खात्यावरील व्याजाबद्दल आयकरात सूट मिळत असल्यास ती आयकर कायद्यातील कोणत्या तरतुदीप्रमाणे ?

--- आयकर कायद्याच्या कलम ' ८० टीटीए ' खाली बचत खात्यांवरील दहा हजारांपर्यंतचे व्याज हे करमुक्त असते. उत्पन्न मोजताना बचत खात्यावरील व्याज हे इतर उत्पन्नात मोजावे व त्यानंतर कलम ' ८० टीटीए ' खाली दहा हजारांपर्यंतची सूट घ्यावी.

कल्याण (जिल्हा ठाणे) येथे मी मे २०१२ मध्ये फ्लॅट खरेदीसाठी नोंदणी (बुकिंग) केली व त्या फ्लॅटच्या खरेदीचा करार ( अॅग्रिमेन्ट) जुलै २०१२ मध्ये झाला. कल्याण-डों​बिवली महापालिका क्षेत्रात स्थानिक पालिका कर ( ' एलबीटी ') लागू झाला व तो मी १ टक्का दराने भरला आहे. करारनामा करतेवेळी मूल्यवर्धित कराबाबत ( ' व्हॅट ') नि​श्चिती नसल्यामुळे तो त्या वेळेस भरला गेला नाही. आता मला फ्लॅटचा ताबा ळिणार असून बिल्डर माझ्याकडे २ टक्के ' व्हॅट ' ची मागणी करीत आहे. तर हा ' व्हॅट ' एक टक्का दराने आहे की दोन टक्के ? माझा ' व्हॅट ' मी कर खात्याच्या कार्यालयात थेट भरू शकतो का ?

--- ' व्हॅट ' ची रक्कम ही आपणास बिल्डरला द्यावी लागेल. ती आपणास थेट भरता येणार नाही. आपणास एक टक्का दराने ' व्हॅट ' भरावा लागेल.

मी एक निवृत्त सरकारी अधिकारी व ज्येष्ठ नागरिक असून , आर्थिक वर्ष २०१३-१४ चे अपेक्षित उत्पन्न पुढीलप्रमाणेः पेन्शन- २ , ६० , ००० रु. , बँक ठेवींवरील व्याज - ७० , ००० रु. , म्युच्युअल फंड योजनांमध्ये केलेल्या गुंतवणुकीवरील लाभांश ( डिव्हिडंड) - ७ , ५०० रु. असे एकूण ३ , ३७ , ५०० रुपये. आयकर कायद्याच्या कलम ' ८० सी ' अंतर्गत १० , ००० रु.ची गुंतवणूक नियोजली आहे. पूर्वी म्युच्युअल फंडाच्या समभागनिगडित बचत योजनेत (इक्विटी लिंक्ड सेव्हिंग स्कीम- ' ईएलएसएस ') गुंतवणूक केलेल्या व तीन वर्षांचा मुदतबंद कालावधी ( ' लॉकइन पीरियड ') पूर्ण केलेल्या योजनेचे २० , ००० रु.चे युनिट विकले तर हातात येणाऱ्या रकमेवर किती आयकर भरावा लागेल ? प्राप्त होणारी रक्कम आयकर विवरणपत्रात दाखविणे आवश्यक आहे ? असल्यास कोणत्या शीर्षकाखाली व त्याबाबतचे आयकर कायद्याचे कलम कोणते ? मला आयकर कसा , किती लागू होईल ?

--- आपण दिलेल्या माहितीअनुसार , म्युच्युअल फंडाकडून मिळालेला लाभांश हा करमुक्त आहे. तसेच आपण कलम ' ८० सी ' अंतर्गत दहा हजारांची गुंतवणूक केली आहे. त्यामुळे आपले करपात्र उत्पन्न रु. ३ , २० , ००० एवढे होईल. ज्येष्ठ नागरिकांना अडीच लाखांपर्यंतच्या उत्पन्नावर आयकर भरावा लागत नाही. उरलेल्या रकमेवर म्हणजेच रु. ७० , ००० वर आपणास दहा टक्के दराने रु. ७ , ००० व शैक्षणिक अधिभार रु. २१० असे एकूण ७ , २१० रु. आयकर म्हणून भरावे लागतील. ' ईएलएसएस ' चे परत घेतलेले पैसे आपण ' सिक्युरिटीज ट्रॅन्झॅक्शन टॅक्स ' (' एसटीटी ') भरून परत घेतले आहेत असे गृहीत धरल्यास सदर रक्कम दीर्घ मुदतीच्या भांडवली नफ्याखाली करमाफ आहे.