भारतापेक्षा इंडियात जास्त बलात्कार!

देशातील बलात्कारांच्या वाढत्या घटनांसाठी राष्ट्रीय स्वयंसेवक संघाचे सरसंघचालक मोहन भागवत यांनी पाश्चात्य जीवनशैलीला दोष दिला आहे. ' बलात्कारांच्या घटना ग्रामीण भागात म्हणजेच भारतात कमी आणि शहरी भागांत म्हणजेच ' इंडियात ' जास्त आहे, ' असे मत भागवत यांनी मांडले आहे.

सिलचर येथील नागरी मेळाव्यात ते बोलत होते. ' बलात्काराच्या घटना गावांच्या तुलनेत शहरात जास्त घडतात. पाश्चिमात्य जीवनशैलीच्या प्रभावाखाली असलेल्या भागांतूनच लैगिक अत्याचाराच्या बातम्या वरचेवर येतात, असे ते म्हणाले. ' या घटना थांबवायच्या असतील तर कठोर कायद्यांबरोबरच महिलांकडे बघण्याचा दृष्टिकोनही बदलायला हवा. भारतीय संस्कृतीमध्ये महिलांना आदराचे स्थान आहे. आदर व सन्मानाची ही संस्कृती पुन्हा आपल्या जीवनात उतरवली पाहिजे, ' असेही त्यांनी यावेळी सांगितले. बलात्कारासारख्या गुन्ह्यांतील आरोपींना फाशी दिली गेली पाहिजे, असेही त्यांनी नमूद केले.