पहिल्याच फटक्यात ' यशराज ' च्या सिनेमात अनुष्का शर्माने ब्रेक मिळवला. इंडस्ट्रीतली ' गर्ल नेक्स्ट डोअर ' म्हणून तिला संबोधलं जाऊ लागलं. आता तर सगळे बड्या बॅनरचे सिनेमे मिळवून ती करीना , कतरिनाला टक्कर देऊ लागलीय. आपला इंडस्ट्रीतला हाच प्रवास तिने खास मुंबई टाइम्सच्या वाचकांसाठी शेअर केला , तो डायरेक्ट दिल से ' मधून.
मी मूळची पंजाबी असले , तरी वडील सैन्यात असल्यामुळे खुद्द पंजाबमध्ये आम्ही राहिलो नाही. कॉलेजचं शिक्षण बेंगलोरला सुरु असतानाच मी मॉडेलिंग करत होते. करिअर नक्की कशात करायचं हे मात्र माझं ठरलं नव्हतं. मॉडेलिंग करायचं , तर मुंबईला पर्याय नव्हता हे मला माहित होतं. त्यानंतर मी मुंबईत आले. केवळ मॉडेलिंग करण्यापेक्षा अभिनयही आजमावून पाहावा , असं मला वाटत होतं. इकडे माझ्या घरातून बॉलिवूडची काहीच पार्श्वभूमी नव्हती. त्यामुळे जे करायचं ते स्वतःच्या जीवावर हे मनाशी पक्क बांधलं होतं. ' यशराज फिल्म्स ' च्या आदित्य चोप्राना माझे फोटो आवडले आणि त्याने मला ऑडिशनला बोलवलं. ' यशराज ' साठी ऑडिशन देणं ही खूप मोठी गोष्ट होतीच. तरी माझ्या कामावर विश्वास ठेऊन मी पूर्ण तयारी केली. ' रबने बना दी जोडी ' साठी माझी निवड झाल्यावर मी काहीशा संभ्रमातच पडले. त्यावेळी आई-बाबांनी मला धीर दिला. फिल्मी करिअर म्हणजे रिस्क असली , तरी बॅनर मोठा होता. सोबत शाहरुख खान होता. त्यामुळे त्यांनी मला प्रोत्साहन दिलं आणि माझ्या बॉलिवूडमधल्या करिअरची सुरुवात झाली.
माझी पहिलीच भूमिका पंजाबी मुलीची असली , तरी ती माझ्या स्वभावाच्या अगदी विरुद्ध होती. त्यामुळे मेहनत घ्यावी लागलीच. शिवाय नवीन कलाकारांना सिनेमात घेतलं की भूमिकेलाही फ्रेशनेस येतो. तन्नीच्या रोलमध्ये मी फिट होतेच. पण , पर्सनली मला मी अभिनय करू शकेन , याची पूर्ण खात्री होती. गरज फक्त एका संधीची होती. मॉडेलिंग करत असताना मी अभिनयाचंही बेसिक शिक्षण घेत होतेच. बॉलिवूडमधली माझी सुरुवात माझ्या मनासारखी झाली. त्याबाबत मात्र मी भाग्यवान आहे. आमच्या घरात कुणालाही सिनेमे बघायची आवड नाहीय. मी मात्र सगळ्या प्रकारचे सिनेमे आवडीने बघते.
अगदी क्वचितच टीव्हीवर सिनेमा बघणारे माझे बाबा एकदा एका खोलीत शांत बसले होते. मी तिथे जाऊन बघितलं तर ते ' वीर-जारा ' बघत होते , शिवाय त्यांच्या डोळ्यातून चक्क पाणी येत होतं. सिनेमा बघताना त्यांना इतकं हळवं झालेलं मी पहिल्यांदाच पाहिलं. याहून पुढची गोष्ट म्हणजे मला पहिल्यांदा सिनेमात बघतानाही त्यांच्या डोळ्यात आनंदाश्रू होते. हीच मला मिळालेली सगळ्यात मोठी कॉम्प्लिमेंट म्हणता येईल.
तुमचीच ,
अनुष्का शर्मा
No comments:
Post a Comment